MARINGANAN JOLMA
NA PARJOLO I DI TAMAN EDEN
(1 MUSA 2,8-15)
1.
DITOMPA DEBATA MA PORLAK EDEN GABE INGANAN JOLMA NA
PARJOLO I.
Dung singkop dipatupa Debata langit, tano, laut, angka binatang dohot
angka suan-suanan; ditompa Debata ma jolma na parjolo i. Jala digoari ma jolma
na parjolo i dohot goar Adam. Lapatanna:
sian tano do pambuatanna. Goarna i do daina. Ai sian orbuk ni tano do dipauli
Debata jolma i (2 Musa 2:7). Dung dipauli Debata jolma i sian tano,
diullushon Debata ma hosa hangoluan tu igungna. Gabe mangolu ma jolma i.
Tangkas do tarida sumurung holong ni Debata tu jolma
i. Alani i do jotjot disoarahon anggo
jolma i ima mahkota ciptaan ni Debata.
Jala dung ditompa Debata jolma i,
dipauli Debata ma muse sada porlak na nigoaran Porlak Eden, ima gabe inganan ni
jolma i. Di porlak Eden ima jolma i
maringanan.
2.
DIPASINGKOP DEBATA DO NA RINGKOT DI JOLMA I.
Di porlak Eden i martubuan ma angka hau nauli jala na
denggan. Jala angka parbue ni hau i boi diparsaulihon jolma i (ayat 9). Parbue ni hau ima sipanganon ni jolma i. Asa
ndang pola loja jolma i mangula. Singkop do diparade Debata angka na ringkot di
jolma i. Dipasu-pasu Debata do ngolu ni jolma na parjolo i. Marhasonangan jala
marolop-olop holan mamuji Debata.
Tangkas do panumpahion ni Debata di ngolu ni jolma i.
Ndang marlaok dohot dosa dope ngolu ni jolma i.
Mangolu dibagasan roha na mangihuthon jala mangoloi Debata. Dung pe haduan,
dung ditangihon Debata soara ni si bolis, gabe tarbuang ma jolma i sian porlak
i. Hir ma hodokna laho mangalului sipanganonna. Loja ma jolma i laho mangalului
angka na ringkot di ibana. Ima na terjadi dung madabu jolma i tu bagasan dosa. Alai andorang, dibagasan
roha na manangihon Debata dope jolma i,
tarpasu-pasu ma ngolu ni jolma i.
Dipasingkop Debata angka na ringkot di Ibana.
Alai na menarik muse, laho manguji hasatiaon ni jolma
i, dipatubu Debata ma ditonga-tonga ni porlak Eden i hau hangoluan dohot hau
parbinotoan na denggan dohot na roa. Jala tangkas do ora-ora sian Debata, na so
jadi panganon ni jolma i parbue ni hau na ditonga-tonga ni porlak i.
Molo dipangan nasida i, didok Debata: madabu tu
hamatean ma nasida. Lapatanna, hamatean secara partondian. Putus hubungan
dengan Tuhan.
Gumodang do na boi panganon ni jolma i, sian na so boi
panganonna. Alai ro ma si bolis mangela-ela jolma i. Ujungna na gabe tarbuang
ma jolma i sian porlak Eden.
3.
DIPASAHAT DEBATA PORLAK EDEN TU JOLMA I ASA DIRAMOTI
JALA DIULA DOHOT DENGGAN
Ragam do suan-suanan na tubu di porlak Eden i. Jala
denggan do partubuna saluhutna. Boi tupa songon i, ala adong do sada batang aek
na mengalir na pabornokkon tano di porlak i. Jala batang aek na bolon i
manipang gabe 4 batang aek, digoari ma i:
1. Pison, na mangaliati sandok tano Hevila, jala tano on ima
panombangan ni sere.
2. Gihon, na mangaliati sandok tano Kus. 3.Hidekel (Tigris), na mamolus tungkan
habinsaran
sian Assur. 4. Euprat.
Saluhutna i patuduhon haulion ni porlak Eden na
pinungka ni Debata. Debata do na patupahon saluhutna i, asa adong inganan
parmianan ni jolma i. Jala dipasahat Debata ma porlak i tu jolma i, asa
diramoti jolma i saluhutna i dibagasan hadengganon. Dipasahat Debata tu jolma i
angka silehon-lehon, dohot tujuan asa diramoti jolma i angka na pinasahatna i
dibagasan hadengganon. Jala unang lupa jolma i pasangaphon Debata. Manangihon
jala mangulahon lomo ni rohaNa. Nang tu
hita pe, godang do angka na pinasahat ni Debata. Hahipason, parbinotan, ulaon,
hamoraon, dohot angka na asing. Tapangke
ma saluhutna i laho pasangaphon Debata.