MANGOLOI TUHAN JALA MANGARADOTI PATIKNA
1.
Holong na tarida marhite angka pambahenan
Di ayat 18 didok
Ap.Johannes: Hamu angka anaha, unang ma
hatanta dohot dilanta mangkaholongi; naeng ma marhitehite pambahenan dohot
hasintongan. Marhite pandohan i,
tangkas dijouhon asa unang holan marhite
pamangan tasoarahon angka holong, alai ndang tarida sian angka parulanta. Naeng tutu tarida sadalan pamanganta na
mansoarahon holong, dohot pambahenanta na pataridahon holong i. Dibagasan na
taulahon angka i, tutu ma hita tudos songon palito na marsinondang na patubuhon
hatiuron tu angka humaliang. Songon na didok Tuhan Jesus di Mat.5:16.
“Naeng songon i ma marsinondang palitomuna di jolo ni halak, asa diida
angka pambahenanmuna na denggan i, asa dipuji nasida Amamuna na di banua
ginjang i.”
2.
Tongtong ma hita dibagasan hiras ni roha mangoloi Debata
Di ayat 20 didok do: “Molo disolsoli rohanta hita, umbalga do Debata
sian rohanta jala diboto saluhutna. Hamu angka haholongan, molo so disolsoli
rohanta hita, marhiras ni roha do hita maradophon Debata.”
Laho mangalapati hata on, naeng do taboto pergumulan ni halak
Kristen uju digurithon Apostel Johannes hata i. Hatiha i, jotjot do sipata tubu
panolsolion na mambahen ndang
tenang/mardame roha nasida. Solsol ni roha manang “tuduhan hati” mambahen
nasida gabe marungkil maradophon halak angka na jahat na hinasogohon ni
rohanasida, laos i ma mambahen nasida gabe ganggu, ala ndang boi diulahon
nasida na nidok ni Tuhan i manghaholongi saluhut halak (termasuk dohot halak na
jahat i) manang masihaholongan. Ala na so boi nasida masihaholongan dohot angka
sibahen na jahat i, gabe tubu ma tu roha nasida manolsoli diri paboa naso talup
nasida gabe siihuthon Kristus. Ala panolsolan i ma umbahen na di dok: “Molo
disolsoli rohanta hita, umbalga do Debata sian rohanta jala diboto saluhutna.
Hamu angka haholongan, molo so disolsoli rohanta hita, marhiras ni roha do hita
maradophon Debata.” (ay.20-21). Alani i ingkon pasahatonta do saluhut tu asi ni
roha ni Debata ndada tu solsol ni rohanta i. Debata ma na manontuhon (menilai)
ndang soara ni rohanta i. Manang songon
dia pe gogo ni rohanta i manolsoli (menuduh) hita, alai dijangkon Debata Parasi
roha jala Pardenggan basa i do hita molo ro hita tu Ibana. Asa marhite i, na rumingkot sipatuduhononta
ima asa tongtong marhiras ni roha hita mangoloi Tuhan i, unang sumurut hita
sian Ibana.
3. Tongtong mangaradoti Patik ni Debata.
Di ayat 22 dohot 23 didok do muse : Manang
aha pe tapangido sian
Debata Amanta i, lehononna do tu hita molo taradoti patikna jala taulahon lomo ni
rohana On do patikNa jala lomo ni rohaNa
siulahononta ima: Asa porsea hita di Anakna Jesus Kristus, jala masihaholongan hita, songon naung tinonahonna i.
On do gabe tanda
(bukti) paboa na tangkas parsaoranta (hubunganta/ relasinta) dohot Debata
Amanta, i ma parsaoran na marojahan tu pangoloion dohot holong ni roha.
Alai tama do
botoonta holan marhite haporseaon di Jesus Kristus do umbahen na tarbahen hita menghaholongi, bahkan manghaholongi halak na
manghasogohon hita.
Holong ima sada tanda/bukti na tarida paboa na tutu porsea hita tu Debata. Holong maradophon
Debata dohot holong maradophon donganta jolma. Jala on do na targombar marhite
silang i. Hubungan yang ke atas (vertikal) dan hubungan yang ke samping
(horizontal).
Laos udut tusi,
dohononta ma muse: angka na mangaradoti patik ni Tuhanta ido na mian dibagasan
Debata. Tondi ni Debata mian dibagasan ngoluna. Antong, molo mian do Tondi ni
Debata dibagasan ngoluna, gabe diramoti jala ditogu-togu Tondi i ma ibana.
Dibagasan pangantusion si songon ima taparhatutu: tangihonon jala oloan ni
Debata angka pangidoanta manang tangiangta.