Psalmen 25, 8-14
MANGIDO HASESAAN NI DOSA
Turpuk jamita on ima bagian sian sada psalmen na marisihon
tangiang mangido pangaramotion ni Tuhanta dohot
mangido hasesaan sian dosa. Psalmen on marharoroan sian raja Daud.
Dirajumi raja Daud do, ndang tarbahen so adong
angka dosa dohot pangaloisionna di hata ni Debata. Pasti do adong angka
dosa na maradophon Debata nang donganna jolma. Lumobi ma i, uju olo ibana diela sibolis mamunu
si Uria, holan asa di ibana jolma ni si
Uria, ima si Betsyeba. Si Uria ima sahalak soldaadu na so olo manjua parenta ni
uluanna. Alai dimanfaaton raja Daud ma pangoloion jala hatobohon ni si Uria. Direkayasa raja Daud ma sada rekayasa keji laho mamunu
si Uria. Diparenta raja Daud ma asa ditempathon si Uria di sada parporangan maralohon
musu nasida. Tujuan penempatan si Uria disi ima boha ma asa dipamate musunasida
si Uria. Dipangke raja Daud do tangan ni musuna laho mamunu si Uria. Dung
tarboto naung mate do si Uria. Dijonoki jala dioli ibana ma si Uria. Sude
rekayasa keji ni raja Daud mardalan do songon rencanana. Ndang adong nanggo
sahalak na mamboto rekayasa keji na i.
Alai lupa raja Daud, tung pe dijolo ni jolma holip jala boi tarporso
ibana sude pangalahona na humurang i, alai anggo di jolo ni Debata patar do
saluhutna pambahenan ni raja Daud na jat i. Tarrimas do Debata hinorhon pangalaho ni raja
i. Ditongos Debata ma panurirang Natan laho paingothon raja Daud di pangalahona
na jat i. Dipasingot panurirng Natan ma ibana. Gabe tarhalomong jala tarjolma
ma raja Daud. Disolsoli ibana ma angka pangalahona na humurang maradophon Debata
nang donganna jolma. On ma na gabe
latarbelakang ni turpuk jamita on.
Hatorangan
ni Turpuk dohot Aplikasina
1.
Dihatindanghon parpsalmen do taringot
hadirion ni Debata na Pardengganbasa jala na bonar (ayat 8-9)
Marhite pandohan on,
naeng hatindanghonon ni parpsalmen taringot hadirion ni Debata na so
manghalomohon angka jolma na tinompana i mangulahon dosa. Sian
mulana nunga dipodahon Ibana dalan na tigor i tu angka jolma i. Alai
jotjotan do, dilaosi jolma i angka na nihalomohon ni Debata. Sai umlomo do jolma i mangulahon angka dosa.
Alani i, madabu ma jolma i tu bagasan
uhum ni Debata. Ai didok do : “upa ni dosa ima hamatean” (Rom 6:23). Ima na tarida di ngolu ni jolma na tinompa
ni Debata mulana i. Dung madabu si Adam dohot si Hawa tarbuang ma nasida sian
porlak Eden. Gabe madabu ma nasida tu uhum ni Debata. Gabe dao ma ngolunasida
sian pasu-pasu ni Debata. Laos ido na taida nang di ngolu ni raja Daud.
Dung madabu ibana tu bagasan dosa. Gabe
tarrimas ma Debata. On ma na dihatahon panurirang Natan tu ibana. Pajongjongon ni Debata ma hatigoran na di
tonga-tonga ni bangso i. Patuduhonon ni Debata ma pembelaanna tu si Uria na dangol
jala na tarjepol.
Mambegei on, mabiar
situtu ma roha ni raja Daud. Pola do alani i, sai martangiangi raja Daud
mangido hasesaan ni dosa jala mapuasa.
Marsinggang ma ibana di jolo ni Debata jala tumatangis hinorhon
hadosaonna. Dirajumi ibana do, naung mardosa ibana maradophon Debata nang
donganna jolma. Ndang berupaya ibana be
manabunihon angka dosana.
Somalna molo adong na
pasingothon hahurangan ni donganna, sai berusaha do na pinasingot i laho
membela diri jala mangalului pembenaran. Alai anggo raja Daud, manigor sadar do
ibana di hahuranganna, jala berusaha laho memperbaiki diri.
2.
Asi ni roha ni Jahowa do dipangasahon raja Daud laho mangido hasesaan ni dosa
(Ayat 9-11)
Udut ni i, dibagasan
psalmen on dihatindanghon raja Daud do songon dia asi ni roha ni Jahowa
maradophon angka na mangido hasesaan ni dosa. Tongtong do marpamuati roha ni
Jahowa mida angka pangalaosion ni jolma
i. Domu tusi ma umbaen didok Martin Luther: Yes
to sinner , no to sin. Lapatanna anggo Debata sai ungkap do
rohaNa manjangkon hamumulak angka pardosa i.
Ido na taida di ngolu
ni raja Daud marhite turpuk on. Tung pe naung mangulahon dosa ibana, alai ala
olo ibana manolsoli dosana, gabe taruli
hasesaan ni dosa do ibana.
Laos domu tusi do na
taida muse di ngolu ni si Petrus. Tung pe nunga dijua ibana Jesus, jala didok
ibana ndang ditanda ibana Jesus. Alai ala olo ibana manolsoli dosana, tarpatupa
Debata do manesa dosana. Ido umbaen didok di bagasan 1 Joh.1:9: “Molo tatopoti dosanta, haposan do Ibana
jala bonar, manesa dosanta jala paiashon hita sian nasa hageduhon.
3.
Marhasudungan do angka na manghabiari Jahowa na olo manopoti dosana (ayat 12-14)
Dung ditopoti
parpsalmen dosana, dihatindanghon ibana ma denggan basa ni Debata.
Dipataridahon Debata ma pambahenan ni Debata ditonga-tonga ni angka na
manghabiari Debata, isarana:
-
Sai na ajarhonon ni Debata do tu ibana dalan
sipilitonna (ay.12)
-
Sorang di hasonangan tondina, jala pinomparna
tumean tano on sogot (ay.13)
-
Tuhan bergaul karib dengan orang yang takut
akan Dia (ay.14).