Efesus 5,8-14
MENGUJI APA YANG BERKENAN
KEPADA TUHAN
I.
Patujolo
Goar ni minggunta on ima Letare. Lapatan
ni Letare ima: Marlas ni roha ma hamu ! Asa, marhite goar ni minggunta on,
dijou do hita asa marlas ni roha. Tontu tubu do sungkun-sungkun, boasa dijou
hita marlas ni roha, jala aha do sihalashononta ? Somalna, torop halak marlas ni roha ima ala martamba-tamba
artana, manang berhasil angka usahana. Adong do muse na asing, marlas ni roha
ala malua nasida sian angka parsahitan manang parmaraan. Tutu do, las rohanta
hinorhon ni angka i, alai las ni roha na
tataringoti marhite na marletare hita, ima las ni roha na mangatasi angka las
ni roha di portibi on. Las ni roha i, ima ala diasii jala dipalua Tuhanta hita
sian angka dosa dohot sian gonggoman si Bolis. On do las ni rohanta. Ala
tangkas holong ni Debata di hita, gabe diain hita gabe ianakkonNa. Ndang be
dibagasan haholomon ngolunta. Alai nunga dibagasan na tiur be. Alani i do
dibagasan turpukta on, dihatahon Apostel Paulus hita ima anak hatiuron (ayat.
8).
II. Hatorangan
1.
Najolo mangolu
dibagasan haholomon do hita, alai nuaeng nunga dibagasan hatiuron (ayat 8-9)
Dibagasan turpuk on, digombarhon Apostel
Paulus do hadirion ni halak Kristen i najolo ima tudos songon sahalak na
dibagasan haholomon. Alai dung ditanda nasida Kristus, ndang dibagasan
haholomon be nasida, nunga dibagasan na tiur i be nasida.
Laos marhadomuan do hatorangan ni
Apostel Paulus on, dohot na nihatahon Jesus taringot diriNa. Didok Jesus do: Au do panondang ni portibi on. Na so tupa
mardalan di na holom na mangihuthon Ahu; di Ibana do tahe Panondang hangoluan.
(Joh 8:12).
Marhite pandohan ni Jesus i, tarida sada
gombaran na binahen ni Jesus taringot hadirionNa. Dipatudos Jesus do diriNa,
songon sada panondang di tano on. Taboto do mansai tangkas, molo ndang adong
sondang na manondangi nngolunta, gabe di bagasan haholomon ma hita. Halak na di
bagasan haholomon, jotjot do ndang mamboto aha na ringkot siulahononna. Olo ma
ibana holan na marangan-angan, ndang mamboto aha siulahononna. Tudos songon ima
jolma na di bagasan haholomon, ndang mamoto ibana, aha do tujuanna umbahen
mangolu ibana. Holom roha dohot pingkiranna.
Asa marhite i, boi ma dohononta,
dibagasan turpuk on tung mansai tangkas
do taida parasingan ngolu na dibagasan hatiuron dohot ngolu na dibagasan
haholomon. Ngolu na di bagasan hatiuron ima ngolu na manjangkon Tuhan. Balikna,
ngolu na dibagasan haholomon ima ngolu na so manjangkon Tuhan i. Halak na so
manjangkon Tuhan i, totop ma ngoluna dibagasan haholomon, alai halak na
manjangkon Tuhan i, sondangan ni Tuhanta ma ngoluna. Jala ngolu na dibagasan
hatiuron ima na mamparbuehon: habasaon, hatigoran dohot hasintongan. Lapatanna: gok las ni roha ma ngolu na
nisondangan hatiuron sian Tuhan i.
2.
Tarjou do hita
gabe sitindangi Tuhanta marhite mangulahon angka ulaon hatiuron (Ayat 9-11)
Songon anak hatiuron, dijou do hita gabe sitindangi
Tuhanta. Gabe sitindangi hita, ima marhite na mangulahon angka ulaon na
denggan. Tujuanna ima: asa marhite ulaon na denggan i gabe lam tamba angka na
porsea di Jesus i. Molo tapamanat, paling tidak boi dohononta adong do 2 fungsi
ni panondang i:
a. Panondang i
berfungsi ima pasisihon haholomon.
Molo
ro na tiur i, manigor sumisi do na holom i. Tudos tusi ma ngolu ni na porsea i,
ima pasisihon hajahaton sian parngoluan ni jolma i. Domu tusi ma umbahen
dipodahon Apostel Paulus asa unang marsaor angka na porsea i tu angka ulaon
haholomon (ayat 11).
b. Panondang i
mambahen asa las.
Di
tano na ngali, somal do halak di si marsulusulu ari. Dipatongon ma tanggurungna
tu mata ni ari asa las. Tudos tusi ma na porsea i, ima mangalehon kehangatan tu
angka na marsaor tu ibana. Las roha ni halak molo pajumpang manang marsaor
dohot angka na porsea i.