DEBATA IMA DEBATA NA MANGOLU
Turpuk jamita on ima sada bagian sian ende na marisihon tangiang tu Debata. Dibagasan tangiangna i dipangido parpsalmen asa dipalua Debata ibana sian angka parungkilan na manosak ngoluna. Marungkil do parpsalmen (raja Daud) hinorhon hajungkatan ni angka jolma na manghasogohon ibana. Ragam dibahen parjahat i laho manusai ngolu ni raja Daud.
Jala, di bagasan tangiangna i, secara jujur dipajojor raja Daud do, lam tu jorbutna pangalaho ni parjahat i. Ndang adong biarnasida mangulahon hajahaton. Jala hira na dipasombu Debata do nasida mangulahon hajahaton nasida i. Menurut raja Daud, hira songon na dao do Debata maradophon nasida.
Pangantusion si songon on, jotjot do tubu di tonga-tonga ni angka na porsea i. Berangkat ma i sian kenyataan, molo taida, jotjotan angka na porsea i mengalami ragam penderitaan ditonga-tonga ni ngoluna hinorhon pangoloionna maradophon Debata, alai balikna do na masa diangka parjahat i. Justru, angka na so manghabiari Debata jala na holan mangulahon dosa, ngoluna songon na berhasil. Hira ndang adong masalahna.
Boasa boi songon i?
Tutu do na lam dao do Debata, jala ndang mangula ditonga-tonga ni angka na porsea i? Na dipasombu Debata do angka parjahat i mangulahon dosa?
Alusni sunghun-sunghun on ma na taida marhite turpuk jamita on.
Hatorangan ni Turpuk dohot Aplikasina
1. Dipangido Parpsalmen marhite tangiangna, asa dipatudu Debata hagogoonNa ditonga-tonga ni angka parjahat (ay. 12-13)
Tangkas do didok parpsalmen di tangiangna asa: “hehe Debata” jala “dipatoltol tanganNa” (ay.12) maradophon parjahat i. Mangihuthon parpsalmen, ndang tarpaida-ida ibana be angka pangalaho ni parjahat i. Holan dosa nama na diulahon nasida. Holan na mangalesani (menista/ mengejek) Debata do diula nasida. Ndang adong dihabiari nasida Debata.
Alani ima, jou-jou parpsalmen tu Debata. Dipangido Ibana do asa dipapatar Ibana habadiaonna ditonga-tongani angka parjahat i. Persoalan si songon on ma na taida di pardalanan ni bangso Israel uju diparhatoban di tano Misir. Songon na maol do antusan, boasa do bangso Israel diparhatoban halak Misir. Padahal bangso Israel ima sada bangso na pinapulik jala na niasian ni Debata. Boasa ma bangso na marsomba tu gana-ganaan boi mamparhatoban bangso na marsomba tu Debata.
Ujungna jou-jou ma bangso i tu Debata, jala dipabangkit ma si Musa manguluhon bangso i ruar sian tano Misir. Ruar bangso i sian Misir, ndang marhite parporangan secara fisik. Ndang songon peristiwa bangso Indonesia manaluhon Bolanda di parporangan. Ndang adong tarida sinjata dipangke laho mangalo halak Misir. Jahowa do “hehe” jala tanganNa dipatoltol maradophon halak Misir. 10 tanda halongangan do dipamasa Debata laho paluahon bangso i sian tangan halak Misir.
2. Marpos ni roha parpsalmen di pangurupion ni Debata. Jala pos rohana di sada tingki pataridahonon ni Debata do hagogoonna di tonga-tonga ni parjahat i. (Ay.14-15)
Dibagasan tangiangna dipatuduhon raja Daud do pos ni rohana maradophon Debata. Dihatindanghon ibana do, tung pe songon na hira dipasombu Debata angka parjahat i. Alai sasintongna “diida jala ditatap Debata do nasida” (ay.14). Adong do tingkina papataron ni Debata hagogoonna ditongatonga ni parjahat i. Jala ndang holan i, dihatindanghon parpsalmen do pangurupion ni Debata di tonga-tonga ni angka na mangido pangurupion sian Debata, angka na gale jala angka na sopot so marama.
Marhite pandohan on, naeng hatindanghonon ni parpsalmen hadirion ni Debata ima Debata na mangolu. Debata na mangula ditonga-tonga ni portibi on. Tung pe hira songon na dipasombu Debata angka parjahat i mangula ulaonna. Sasintongna, ndang na dao Debata. Alai na adong do sangkap ni Debata, anggiat adong hamubaon ni roha di angka parjahat i. Mulak nasida sian angka dalanna. Hombar songon hataNa:
“Songon sintong na mangolu ahu, ninna Tuhan Jahowa, tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana” (Hesekiel 33:11).
Alani i, tung aha pe namasa unang ma hita mangiburu manang mangapian marnida ngolu ni parjahat i. Tongtong ma tapasahat saluhut gulmit ni ngolunta holan tu Tuhanta. Asa Ibana na mangurupi jala manogu-nogu hita. Ai Debata na mangolu do Ibana.